Rusiye tarafından Qırımğa alıp ketilgen ve "casuslıq"ta qabaatlanıp 10,5 yılğa üküm etilgen Herson faali İrına Ğorobtsova Mordoviyadaki 2-nci qadın koloniyasından mektüp yazdı. Mektüpte o, 45 kişilik odada yaşağanını ve sağlıqnen bağlı problemleri, tahikardiya ve baş ağrıları olğanını bildirdi. Bu aqta onıñ babası Vladimir Ğorobtsovğa atıf etip, "Supilne"ge haber ete.
"Tikiciler brigadasında çalışqanını yazdı. 45 qadın içün azırlanğan odada yaşay. Sert rejim — er şey cedvel boyunca. Eşyalarnı yollamaqnı rica etti. Biz özümiz toplap olamaymız. Bunıñ içün er şeyni kene göñülliler vastasınen yapacaqmız", — dedi o.
Ğorobtsovnıñ aytqanına köre, İrına biryollanmanı oraq ayınıñ 31-nde alğan. Cezahanege ketkende biraz suvuqlanğan, amma şimdi tüzelgen.
"Amma şimdi o, yahşı. Tahikardiyadan şikâyet ete — yüregi hasta. Baş ağrısından şikâyet ete, tek ilzc qurtara. Onıñ biraz ilâcları bar edi ve göñülliler yardım ete. Em de aşayt malları ile de yardım eteler", — dey Ğorobtsov.
İrına Ğorobtsova hersonlı aq qorçalayıcı ve cemaat faali. 2022 senesi saban ayında şeer Rusiye ordusı tarafından işğal etilgen soñ, o, tibbiy hadimlerge yardım etmege başladı. Qadın Rusiye Federatsiyasınıñ arbiyleri tarafından zorbalıqqa oğrağan yerli sakinlerge sağlıq saqlav aqqını yerine ketirüvde yardım ete edi. İçtimaiy ağlarda Ğorobtsova işğalge qarşı barışıq aktsiyaları ve şeerdeki yaşayış tecribesi aqqında tarif ete edi.
2022 senesi quralaynıñ 13-nde Ğorobtsovanıñ tuvğanları, ana-babasınen yaşağan evine saba "Z" işaretli eki maşna kelhenini haber etken edşiler. Rusiye arbiy urbasında bir qaç adam evge basıp kirgen ve qadınnı zornen maşnağa oturttıp alıp ketkenler.
2024 senesi saban ayında Rusiye Federatsiyası kontrol etken makeme Ğorobtsovnı casuslıq davasında 10 yıl 6 ayğa azatlıqtan marum etti.
