Qırımda 2024 senesi baarde ğayıp olğan üç qadınnıñ tutulğanı tasdıqlandı. Larisa Gayday, Tatyana Pavlenko (Simonenko) ve Elvira Aboyazov Aqmescitniñ 2-nci SİZO-sında bulunalar, dep haber ete Qırımtatar resurs merkezi. Rusiye akimiyeti tutulğanınıñ sebeplerini ve qabaatlavlarnı aydınlatmay.
"Qırımtatar resurs merkezi bir yıl evelsi olarnıñ ğayıp olğanlarını qayd etken edi, lâkin yaqında olarnıñ bulunğan yeri aqqında malümat aldı — olar Aqmescitniñ 2-nci SİZO-sında tutulalar", — dep aytıla haberde.
Qayd etilgenine köre, şimdilik Qırımnıñ Rusiye akimiyetinden tutulğanlarnıñ sebepleri, qabaatlavları ya da apiske alınuvı aqqında, em de olarnıñ uquqiy statusı aqqında iç bir resmiy malümat yoq.
"Bu, Rusiye işğal qurulışları 2024 senesinden berli faal qullanğan tipik ameliyatnıñ daa bir örnegidir: insanlarnı alıp keteler ya da tutıp alalar, soñra olarnıñ aqqında ne tuvğanları, ne aq qorçalayıcılar, ne de cemaatçılıqqa haber etilmey. Tutuluv yeri aqqında malümat apiske alınğanından soñ aylarnen ya da bir yıl soñra peyda ola", — dep qayd ettiler QRM-de.
QRM qayd etkenine köre, Qırımnıñ işğalinden berli Rusiye akimiyeti 11 qadınnı devlet hainligi ve terrorizmde qabaatlap, azatlıqtan marum etti, daa 14-ü SİZO-da tutula ve yalıñız 7-si taqiplerden soñ azat etildi.
