Rusiye mahkemesi tarafından 19 yılğa apis cezasına mahküm etilgen qırımtatar aq qoruyıcısı Riza İzetovnı Yakutsknıñ 1-inci SİZO-sından belli olmağan yerge etap ettiler. Bu aqta "Qırım birdemligi" cemaat birleşmesine advokat Nazim Şeyhmambetov bildirdi.
İmayeciniñ aytqanına köre, oraq ayınıñ 28-nde Qurman rayon mahkemesinde Riza İzetov ve anasınıñ davası tekrar baqıldı. Bundan evel Rusiye kontrolindeki Qırımnıñ Qurman rayon mahkemesi İzetovlarnıñ talaplarını qanaatlendirmedi. Qırımnıñ Rusiye Yuqarı mahkemesi istinaf şikâyetinde işni yañıdan baqmağa qaytardı.
Şimdi Qurman rayon mahkemesi, qırımtatarnı belli olmağan yerge alıp ketkenleri sebebinden, davanıñ baqılmasını toqtattı. Qırımtatar tüzetüv müessisesine ketirilmegence, dava boyunca oturışuvlar olmaycaq, dep qayd etti imayeci.
Şeyhmambetov şunı da aytıp berdi ki, arman ayınıñ 1-nde Qırımnıñ Aqmescit rayon mahkemesi Riza İzetovnıñ 2024 senesi küzde 1-inci taqiqat izolâtorında bulunğanından bu sene qara qış ayına qadar SİZO-da bulunması qanunsız olğanı aqqında davanı baqmağa başladı. İlk evelâ mahkeme, kiçik ayda imaye tarafınıñ bergen arizasını red etti. Amma soñra Qırım Yuqarı mahkemesi şikâyetni qanaatlendirip, davanı keri qaytardı.
Uzun mahkeme esnasları sebebinden İzetovnıñ SİZO-ğa yerleştirilüvi aqqında dava tek şimdi baqılmağa başladı. Amma, adliyeci Şeyhmambetovnıñ qayd etkenine köre, aq qorçalayıcı qara qış ayından soñ da ceza izolâtorına qapatılğanı belli.
Mahküm etilgenniñ cezahaneden çıqarılğanı sebebinden, dava boyunca oturışuv ilk küz ayınıñ 1-ne avuştırıldı.
2023 senesi saban ayınıñ 10-nda Rostov-na-Donu Cenübiy okrugınıñ arbiy mahkemesi Remzi Bekirov, Riza İzetov, Raim Ayvazov, Farhod Bazarov ve Şaban Umerovnıñ ükümlerini çıqardı. Olarnı Rusiye Federatsiyası Ceza kodeksiniñ 205.5 maddesiniñ 1-inci qısmına istinaden ("Terror teşkilâtınıñ faaliyetini teşkil etüv") qabaatlağanlar. Qalğanları – Rusiye Federatsiyası Ceza kodeksiniñ 205.5 maddesiniñ 2-nci qısmına istinaden ("Terror teşkilâtınıñ faaliyetinde iştirak etüv"). Dava mabüsleri Rusiye Federatsiyası Ceza kodeksiniñ 30-ıncı maddesiniñ 1-inci qısmı ve 278-inci maddesine istinaden ("Akimiyetni zorbalıqnen zapt etüv azırlığı") qabaatlandı.
2019 senesi saban ayınıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden "Qırım birdemligi" faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan "Hizb ut-Tahrir" teşkilâtında iştirak etkeninde qabaatlanğan 24 faal tutulğan edi. 2019 senesi saban ayınıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
"Memorial" aq qorçalayıcı merkezi 2019 senesi saban ayınıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
