Rusiye mahkemesi tarafından 12 yılğa azatlıqtan marum etilgen qırımtatar cemaat jurnalisti Amet Suleymanov Vladimirskiy tsentral pishanesinde ekinci gipertonik krizini keçirdi. Bu aqta "Qırım birdemligi" cemaat birleşmesine onıñ ömür arqadaşı Lilâ Lümanova bildirdi, o, aqayını ziyaret etip oldı.
Onıñ aytqanına köre, Suleymanov zayıflıq duya, onı ara-sıra yürek ağrısı raatsızlay. Qırımtatarnıñ apayı, bu sebepten onıñ sıcaqqa dayanması zor olğanını qoştı.
Suleymanov birinci gipertonik krizini 2024 senesi quralayda keçirgen edi. Yüksek qan basımı sebebinden qırımlınıñ burnundan sıq-sıq qan aqa, nefes tarlığı ola, başı aylana.
Şimdi Amet Suleymanovnı bedeninde peyda olğan lekeler de raatsızlay. Bundan evel eşkenler peyda olğan edi, sebepleri alâ daa belli degil, dep bildirdi Lümanova.
Amet Suleymanov körüvi fenalaşqanından şikâyet etti. Keçken seneniñ küzünde ekimler jurnalistke çilter zar angiopatiyasını diagnozını qoydılar. Tedavi etilmese, angiopatiya körlükke ketire bile.
2021 senesi Rusiye mahkemesi Amet Suleymanovnı "Hizb ut-Tahrir davası" boyunca 12 yılğa üküm etti.
Suleymanov sağlıq vaziyeti sebebinden üç yıl ev apsinde edi. Jurnalistniñ arterial ve mitral yürek yetersizligi bar, yürek klapanı deñiştirilmeli.
2023 senesi çeçek ayınıñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
2024 senesi saban ayında Vladimirdeki Frunze rayon mahkemesi Amet Suleymanovnı apishaneden azat etmedi. Onıñ hastalıqları ise apiste tutulmasına mania ola. Suleymanov uquqçılarnen beraber mahkeme qararına istinaf şikâyetini berdi.
"Memorial" aq qorçalayıcı merkezi Amet Suleymanovnı siyasiy mabüs dep tanıdı.
