2025 senesi arman ayınıñ malümatına köre, işğal etilgen Qırımdan eñ az 26 qadın yarımada ve Rusiyeniñ tahqiqat izolâtorlarında ya da tüzetüv cezahanelerinde qanunsız alda buluna. Bunı Qırımtatar resurs merkezi bildire.
"Bazıları uzun müddet devamında apiste buluna ve ciddiy sağlıq problemleri bar. Hususan, cezahanede tutulğa ve kerekli tibbiy yardım almağan İrına Danılovıç ve Ğalına Dovğopola", — dep aytıla haberde.
Merkezniñ ekspertleri qayd etkenine köre, qadınlar, kerekli tibbiy yardım, gigiyena şaraitleri, ruhiy basqı ve tuvğanlarınen bağ sıñırlavları sebebinden, erkeklerge köre cazahane şaraitlerinde daa zor yaşaylar.
"Qırımtatar resurs merkeziniñ qayd etkenine köre, işğal etilgen Qırımda qadınlar muntazam sürette basqığa oğray, aşalana, memuriy ve cinaiy taqipke oğratıla. Zorbalıq, ğayıp oluv ve tibbiy yardım kösterilmemesi neticesinde ölüm adiseleri aqqında haber etile", — dep aytıla haberde.
Daa evel Qırımda 2024 senesi baarde ğayıp olğan üç qadınnıñ tutulğanı tasdıqlandı. Larisa Gayday, Tatyana Pavlenko (Simonenko) ve Elvira Aboyazova Aqmescitniñ 2-nci SİZO-sında bulunalar. QMC malümatına köre, Rusiye akimiyeti tutulğanınıñ sebebini ve qabaatlavlarnı aydınlatmay.